كتبت فيكى اشعار واغانى
قالوا عليا دا واد مجنون
لانى قلت صعب انساكى
أو أنسى يوم هواكى
وانك عندى كل حياتى
قالوا عليا دا واد مجنون
وشكله كدا مش مهموم
ولا حس بمشاكلك يوم
قلت وماله اكون مجنون
بحب بلادى واكون مهموم
بس أنا عمرى ما سبت بلادى
بس أنا رافض اكتب شعر
يقول ويوصف ماَسى
هكتب شعر يوصف أيه
ويقول أيه
اكتب عن محمد ويا أخوه
والفلوس بينهم قيود
ولا اكتب عن عيسى ويا جاره
والصراع عايش ومش هيموت
شعرى صعب يقول ماَسى
شايلها قلبى من سنين
قلبى شايل حمل صعب
لو يعرفوه يموتوا بيه
لو سبت شعرى يوصف حالى
هيدخل قلبى يلاقى هموم
وهيطلع وهنغرق فيها
عرفتوا ليه شعرى عاجز
يوصف شعب دايما عاجز
انه يدمر فكر غريب
انه يجمع شمل بعيد
ويرجع حب مسافر
حب فى قلب كله جروح
دا صعب احساسك بان كل شئ منك يروح
وانك تعيش فى وطن دايما مجروح
مجروح لانك عايش فيه
وبتفرق بين اللى فيه
مسلم ولا مسيحى عايز ايه
عايز منى فكره وعلم
ولا خراب ودمار على طول
مسيحى ومسلم هتفرق ايه
طول عمرنا عايشين مع بعض
ولا حد هيقدر علينا
طول ما ايدينا ويا بعض
صحوا الفكر من جواكم
واحيوا الحب اللى اتقتل
وسيبونى لوحدى احب
واكون مجنون بحب بلادى
واكتب عنها اشعار واغانى
ولا اكتب عنها اى ماَسى
احمد كمال
ليست هناك تعليقات:
إرسال تعليق