صوتك وأنت بتكتب صحا الناس
وقلقهم وهما فى عز نومهم
خليتهم يكرهوك من غير ما يشوفوا كلامك
وأنا مش هقولك وطى صوتك يا قلم
لا هقولك حسن خطك
عشان إللى مش سامع يقرا
وميتلككش فى يوم
ويرمى العيب على صوتك
عايزك تصحا
وتصحى ضميرك
اللى مش عايزه من جواك يخاف
أوعا تخاف مـ الناس ولا من عمايلهم
خلى صوتك دايماً عالى
وخطك فى عيونهم واضح
ومترفعش راية الخوف
مهما كان العذاب
وخليك دايماً فاهم
أن الحق دا شئ واضح
هيحبسوك
ويبهدلوك
ويعذبوك
بس اكتب طالما خطك لسا بخير
ولو كسروا سنك متيأس
هيطلعلك سن جديد تكتب بيه
وبخط كمان أوضح
والعالم كله يحلف بيه
واللى يدايقك أكتب عنه
وعرفوا أنك صاحى فـ عز الليل
ومهما كان برد الليل
أطلع وأكتب على كل بيت
صحوا ضميركم اللى أتقتل
ورمتوه وقفلتوا عليه
ومن غير مقاومه أو صراع
أوعا يغرك يوم صوتك
وتتقلب وتبقا من الأعداء
خلى صوتك دايماً صاحى وفايق
وأوعا فى يوم تنام
لحسن حد يحس يضعفك
ويفضل صوتك مش مسموع
لغاية ما تموت مـ الحسره
على صوتك اللى كان مسموع
ليست هناك تعليقات:
إرسال تعليق