بدون مقدمات

بدون مقدمات لانى اتعودت انى مكترش فى الكلام

هقول على الفكره او الكلمه اللى جوايا وبدون مقدمات

وياترى كلمتى النهارده هتكون عن ايه؟

كلمتى هتكون عنى وعنكم......

وازاى بيكون فكرى وفكركم........

اعزائى الشباب هحكيلكم حكايه

طيب ليه اساسا احكى حكايه وانا نفسينا حكاية!

بنزعل ؟

بنحبط؟

بنتخنق؟

بندمع؟

كل ده ليه وايه اساس الزعل وايه اساس يستحق من البدايه الزعل؟

انت دلوقتى بتقرا كلامى وشايفه بعنيك صح؟

طيب لو مكنتش قادر تشوف كلامى كان زعلك هيكون شكله ايه ياترى ؟

وبعدين انت شايف كلامى وعندك القدره انك ترد عليا وتكتب رايك صح؟

ايه رايك لو مكنش عندك القدره والاستطاعه على تحريك اصابعك لكتابة رايك

بصراحه؟

يعنى احنا بنزعل من حاجات لو فكرنا بجد فيها هنستفاد منها فى حياتنا

عايزين نخلى اى امر صعب يمر علينا فى حياتنا وسيله لينا لوصولنا لحلمنا

متشكرين

متشكرين
           الكلمه دى اتقالت منا كتير

يوم ما مشينا فى سكه ضلمه وهربنا من حلم السنين

متشكرين
           ياما طلعت منا كتير يوم ما انضربت واتهنت كتير


متشكرين
          على علو صوتكم اللى فكرنى بصوت الحمير


متشكرين
          بقولها دايما لانى صابر من سنين


متشكرين
          بقولها لحكومه ظالمه بتنهب من سنين


متشكرين
         يوم ما اتمسكت وايدى فاضيه واتهنت وبعلو صوت


متشكرين
         ياريسنا يامعيشنا فى خوف كبير


متشكرين
         يازالينا وضاربينا ومضيعين حقوق كتير



متشكرين
      مليت منها وكفايه بقى شكر كتير

قران كريم مشارى راشد

اراء سياسيه

انا عندى اراء سياسية

فى الحاله الاجتماعية

وزياده فلوس النور

وحاجات تانيه اللى هيه

طبور عيش ممدود

وسط طريق مسدود

وحاجات بتحصل منه

دايما مش مرضيه

وتطلع لغايه بره

تركب كدا الاتوبيس

تلقاه بقى علبه

واتملا بالكلام والصويت

وقف ياعم الاسطى

نازل هنا على جمب

خلص بسرعه يابيه

الطريق بقى كله غم

وعاملى فيها مدير

بالبدله والشنطه

وسع ياسى الاستاذ

وحاسب زرار البدله

لما انت كدا وزير

راكب ليه الاتوبيس

ولاانت هتفرسنا

وتعيش علينا كبير

كفايه كدا اراء

لحسن الحاله خلاص

كرهت خلاص الكلمه

والراى والافعال

................................

ودى كام صوره واقعيه لطبور العيش والهدوء فيه

ايه رايك تسيبك من بكره

 وتخليك فى النهارده

خليه اجمل من كل يوم

هتلاقى بكره يجيلك

على طبق من فضه

ويقولك انا هه موجود

 تلقى الحياه قدامك

وكل الاحلام متحققالك

 بس انت يلا قوم

وارمى كل الهموم

وعيش دايما حياتك

على الامل المرسوم

 خلى فى قلبك نور

وحلمك امل مسطور

 وعيش النهارده

مؤمن بقلب جسور

فكر فى النهارده

وسيبك من اى يوم

يوم مر خلاص وفات

او حتى يوم بعديه

اجرى وسابق الريح

واتعلم تبقى خفيف

واحلم اكيد ببكره

وبالامل يفضل على طول

دعونا

 

طول ما الحياه بتدور هيفضل فيها امل

طول ما الدنيا سعيده اكيد فى امل

طول ما احنا بنحلم هيكون الامل موجود

طول لما نعبر عن فكرنا هيكون الامل مولود

الامل والتامل حاجتين موجودين

زيلوا عنهم التراب وخلوكم شايفينهم بوضوح

غنوا وبعلوا الصوت ان الامل موجود

ارسموا وباجمل خط ان الامل محبوب

دعونا نحزن

دعونا نفرح

دعونا نحلم

دعونا نتامل

دعونا نعيش

دعونا نستمتع باجمل الاوقات قبل ما يروح عمرنا

دعونا نرى الدنيا باجمل النظرات

دعونا نضحك وباعلى الاصوات

دعونا وفكوا قيودنا واتركونا مع الامال

خليك زى الهوا

خليك زى الهوا طليق

محدش بيتحكم فيه

ولا يقدر يوم يمنعه مانع

مهما كان عالى وشديد

خليك زى الهوى

 محدش يقدر يكتمه

قول رايك مهما ان كان

وعبر عن اللى جواك

خليك زى الهوا

 سرعان ما يعود لصفائه

بعد الاتربه التى تغير لونه ونسيمه

خليك زى الهوا ماشى فى كل مكان

اعزائى الشباب

ايه المانع من اننا نكون زى الهوا

عايز رايك فى اى مكان يتسمع

عايز صوتك يجلجل المكان ويتفهم

يبقى لازم تسمع الناس

وتشوف رايهم

وانتقادتهم وفكرهم

خلى عندك شجاعه وثقه فى رايك

وحاول تتناقش وتقول عليه

ارمى الكسوف خلاص والخجل

واتحدى الناس وقول رايك بدون خجل

قول اللى تقوله مش هتوصفنى

ممكن تقول عليا انى انا شاعر

او تيجى يوم وتقول عليا عالم

بس انا مش دول

لا انا انسان عايش

ممكن اكون شاعر

ممكن اكون انسان عادى

بس احساسى مش عادى

ممكن اكون فنان

برسم كدا فى الحياه

بلون وخطط فيها

وبالى مرتاح

عايش على الاحلام

ومفيش فى قلبى خداع

وكل الناس حوليا

عايشه فى نعمه كمان

وزى ما قلتلكم انى انسان عادى

بس احساسى اكيد مش عادى

عايش وانا شاعر بعبر عن الحياه

يمكن افوق من نومى

ويتغير معنى الحياه

بدون عنوان

                            
                             بــــــــــــــــــــــــ عنوان ـــــــــــــــــدون 

دى قصيده كتبتها فى أزمه من الازمات

كنت كتبتها وانا ناسى معنى الحيـــاه

وبدم جروحى خططهـــا

وبدمعى رسمت ورده دبلانه

محتاجه تحس بطعم الحياه

كتبت قصيده بدون عنوان

ممكن يوم تتغير ويصبح ليها عنوان

بعد ما كانت عايشه ضايعه بين الازمات

كتبت قصيده بدون عنوان

لانها بتحكى عن أيام

ضاعت ومرت بدوناستأذان

كتبت قصيده بدون عنوان

شارك فيها جميع الناس من كل مكان

كتبت قصيده بدون عنوان

لانى كتبها بدم الشهداء

بــــدون  عنـــــوان

دا اسم قصيده محتاجه تعيش ولو ليوم

بس بعنــــوان

دردشه بسيطه

عارفين ايه سبب تخلف فكرنا السبب هو بعدنا عن حبنا وحبنا اكيد هو ربنا غيروا فكركم واتمتعوا بحبكم الله معانا فى كل وقت ومكان ممكن نكون مش عارفين انه بيحبنا بس ايه اكتر من اننا مسلمين دليل على انه بيحبنا
وايه تانى عايزينه واحنا معانا مفتاح الجنه فى حبه
اكيد لو مش واخدين بالكم من حب ربنا يبقى كدا محتاجين لحظه تعرفنا على ربنا
لف ودور واتعلم واعرف واستشعر معنى حب المولى عز وجل
اتعلم ازاى تعبده وتكون منه قريب
وعيش على حلمك وخليه ليه فى الخير

تخيل

تسمحولى اطلب منكم طلب

انكم بعد ما تقروا تتخيلوا نفسكم وطبقوا الكلام عليكم بس وانتوا عنيكم مغمضه

تخيلوا معايا اشخاص ميمتلكوش فلوس

ولا حتى الصحه

حالهم هيكون ازاى

شباب كتير واطفال اكتر عندهم مرض "السرطان"

اتخيل حياتهم هتكون ازاى وسط صراع المرض وتحديات الحياه

وازاى هتكون نظرتهم لالوان الحياه وازاى هيعرفوها وهما مش عارفين فيها غير اللون الاسود وبس

بس بالرغم من ان تخيلتنا ممكن تودينا لبعيد لحالهم مع المرض

الا انهم بيصحونا بكلامهم عن ربنا وحبهم ليه

بيتحدوا

وبيصارعوا

بيحلموا

ويتاملوا

بيتعلموا ان مفيش حب من غير تضحيه

وبيعلمونا ازاى نكون عايشين واحنا بنحمد ربنا

هنتدم بجد لو بعدنا عن رحمته

ربى ادمع من اجل حبك لى

ابتسم من اجل ابتسامتك لى

فهل تحرمنى من لقياك

اعلم انه مستحيل ولكننى علمت بانك تحقق دوما المستحيل

وامنيتى ان اكون فى ظلك يوم لا ظل الا ظلك

يلا فتحوا عنيكم وحسوا بطعم الحياه وافرحوا وعيشوا جمب الاله

واتعلموا ازاى تعرفوا ان ربنا حبنا واحنا منه بعاد

سيبك من حزنك

حزن ايه ونكد أيه

خليك فريش ومتقولش ليه

بردوا بتسأل وعايز تعرف

هتسيب الحزن ليه

أرمى همومك من ورا ضهرك

وأبدا فكر يلا وقول

أنت سايبنى ورايح فين

أمال أنا جاى وبتكلم ليه

خلى شعارنا دايما بسمه

وأحلامنا مليانه طموح

ولو فى قلبك حزن او هم

يلا أجمعها بس بسرعه

وارميها من هنا فى الميه

وأنساها ويلا عيش

وأبدا دور على أحلامك

ومتنساش لو لقيتها

اوعى تسيبها وتجرى بعيد

ولا تحس انك بتكبر

وتخلى عنيك تبص لفوق

يبقى ساعتها حلمك يجرى

ويسيبك تعيش وحيد

يلا أبدا غير نفسك

واجعل هدفك حب وخير

وأبتساماتك فرحه وضحكه

وعيونك من الفرحه بترقص

واتحرر من كل قيودك

وارمى اى فكر غلط

دى الحريه نور بينور

العقل والقلوب

حصريا

حصريا




ولاول مره



الان



فلم المسخره الكبرى



على جميع قنوات المهازل الكبرى



هو ده حال الصيف والشتاء ومناسبات الاعياد



تفتح التلفزيون اغلب القنوات



حصريا فيلم ........



واه لما يقرب رمضان تلاقى كلمه حصريا



على كل قناه



افلام



مسلسلات



فوازير



مسابقات



وكلها بنات



وكلام ملهوش ايه لزمه من الاساس

طيب وهوا اساسا ايه هدف السينما

وهدف الافلام

هدفها انتشار الفوضى وكتر الكلام

ولا هدفها تعليم الناس قله الادب فى الفعل والكلام

الافلام كلها عرى بقيت خلاص

وامتلت كلها بالصراعات وتعليم الخلاف

ياترى هما هدفهم ايه يوصلوه للشباب

هو عشان اوصلك فكره لازم اخليك تشوف وتسمع حاجات تنافى لمبدا الاخلاق




تلاقى الفنانه منهم تحضن وتبوس



وترقص وتتدلع



وتقولك انا لسا جايه من العمره



عمره ايه دا انتى عمرك ملهوش لزمه



والتانيه بتصلى يعينى وتصوم



وتمثل وهى عماله تبوس



بالذمه اللى زى دى متجوزه راجل حتى



يا عينى على الجمال المتهان



والكرامه المرميه



والدين المتداس بسبب الناس ديه



ربنا يهدينى ويهديكم ويهديهم

الحب

الحب ده مشكله كبيره لان معانيه كتيره صعب حد يجمعها أو يعبر عنه بطرق قليله

موضوع كبير محتاج نظره وفكره عميقه وفى نفس الوقت نظره وفكره صريحه.

كلنا بنحب وبنتحب واللى محبش مسيره يوم ويحب

الحب ده ليه انواع كتيره مش نوع واحد بس دلوقتى ومع التكنولوجيا الحديثه

بدل ما يتعدد ويزيد الحب أصبح الحب قليل ونادر الوجود

وبقى نوع واحد

وهو اللى سايد وهو حب شاب لفتاه أو العكس

بس ياترى الحب ده بس هو اللى منتشر حاليا

أقولكم طبعا لا بس هو ده الحب السائد والمطروح على الساحه بأختلاف طبقاتها المجتمعيه.

وهقولكم كلمه صغيره بتشيل معانى كتيره للى بيحب أو نفسه انه يحب

خليها دايما قدامك هتعيش طول عمرك بتحب وتوصل بحبك بر الامان.

الحب ما هو الا وعد فتمسك به ولا تتركه يخن من احببت وأعلم بذلك أنك تستطيع أمتلاك قلب الحبيب ولا يستطيع شى الفراق بينكم.

وعشان تحب أى شخص او أنسان فى أساسيات لازم تحبها بس بصدق مهما كانت

الظروف اللى حوليك عشان تكون صادق فى حبك للناس اللى حوليك

اولهم حب ربك ومتبعدش عنه.

وحب الرسول وخليك دايما جمبه.

حب وطنك ومتتخلاش أبدا عنه

دى بدايات واساسيات الحب اتعلمها وانت هتحب بجد واخلاص

لماذا لا نبكى!!!!!

لماذا لا نبكى أتعلمون لماذا لا نبكى؟

لاننا أصماء لا نسمع ولا نتكــــــلم

حقا اننا نسمع ونتكلم ولاكــــــننا

نسمع الذى تهواه نفوســــــــــنا

ولا نسمع الحقيقــــــــــه أبـــــــداً

ونعم اَننـــــا نتـــــــــــــــــــــكلم
ولاكن كلامنا ما هو الا بعض هتافات
لا تصنـــــع لـنـا شـــــــــــــــــــــئ

ولكنها تضرنــــــــا بمصائبهــــــــــا

نريد اَن نبكى على صمتنـــــــا

نريد أن نبكى لعل وعسى اَن نفيق مما نحن فيه

وصمتنا هذا يضرنا فها ترون فى صمتكم ولصمتكم أجابه

وكيف نجيب ونحن لا نسمع سؤال بعضنا البعض






فمتى سوف تبكـــــــــــــون أجيبـــونــــــــى


وأخرجــــوا مـــــــن صمتكـــــــــــــم

لعلكم تضحكون بصـــــــوت عــــــــــال

وتخرجوا نفسكم من زنزانه الصمت المميت


لماذا نبكى لاننا لا نقف وقفه صريحه


مع انفسنا كى نفيق من غفلتنا وصمتنا

الثقه بالنفس

أحيانا يرى اغلب الناس الاشخاص المحيطون بهم لديهم ثقه بالنفس عاليه فيعتبرها

البعض غرورا او تكبر او تعالى  وغيرها من المفاهيم التى تطلق على الشخص الذى

لديه ثقه فى النفس.

ولكن من وجهه نظرى أنه ليس كل شخص يثق بنفسه لا يعد مغرورا بل يعد طموحا

وصاحب نظره مشرقه يعتليها الامل القوى وروح الدعابه التى تجعل من أصعب

الامور جسرا يعبر به الى أحلامه الشخصيه.

نصيحه خليك واثق من ربنا وثق بنفسك اكيد ومتخليش حياتك بين الناس زى الكوره

يلعبوا بيها ويتحكموا فى شخصيتك واحلامك ويرموها بينهم وفى الاخر يرموها بعيد.
.

ثق بنفسك وعلى صوتك بيها ومتخليش ثقتك بنفسك تبقى غرور يوم من الايام.

واوعاك تكون مغرور او حتى تكون متعالى وأنت أساسا جاهل وعايش كأنك عالم ثق

فى ربك وثق بنفسك على طول ومتخليش اليأس يتملك فيك واوعا وحافظ على نفسك

لحسن ثقتك منك تضيع وثق فى حلمك مهما ان كان بس ثقه فيها واقع مش خيال.

حاول تكون كداب

فى البدايه زعلان ليه ؟

ومن ايه؟

وعشان ايه؟

وايه يستحق الزعل؟

ياترى زعلك نفسك تكون محبوب والناس تعرفك؟

ولا نفسك تملك فلوس ورصيدك فى البنك يعلى؟

نفسك فى انسانه تأنس وحدتكوتشيل همومك؟

الناس اللى حوليك طبعها اتغير بتتعامل معاك ومعاملتهم حاسسها غريبه

وقلوبهم كلها كدب والصدق منها اختفى وحاسس ان القلوب كلها بتخدع

وخايف تمشى زى ما هما ماشيين وتكون صاحب كدبه وقلب خادع!

شايف الحزن والكأبه دايما فى وشوش اللى حوليك ونفسك تشوف ضحكه أو حتى أبتسامه

حلوه طالعه تنور قلبك من جواك والدنيا من حوليك.

خلى بالك الحل بسيط ومش محتاج لف ودوران كتير

والاجابه فى 3 كلمات

وهما حاول تكون كداب

استنا متهربش واسمع للنهايه واحكم فى الكلام

انا مش عايزك تكدب على الناس واللى حوليك لا انا عايز منك كدبه خفيفه خالص

 ومش كدبه بيضه لا دى كدبه شفافه  بس هتغير من قدامك كل شئ

 وهتغير فيك وفى اللى حوليك وعلى راى المثل "أسال مجرب ولا تسألش طبيب"

 أنت عارف أنا عايزك تكدب على مين بالظبط

عايزك تكدب على نفسك وتغير نظرتك فى كل شئ طبعا

أنت لسا مش فاهمنى طبعا أنا هقولك قصدى أيه.

بتدرو على السعاده ومحتار فين تلاقيها!

طيب وليه من البدايه تدور والحل معاك وفى ايديك

 بص لنفسك وشوف عندك ايه وبص للى معندهوش نعم زيك وعشان تحس بالنعمه شوف اللى متاخده منه

اكيد سعتها هتكون سعيد بنفسك 

على فكره انا لسا مدخلتش فى ازاى هتكدب

ادينى هقولك ومش هطول عليك

الدنيا بقيت مليانه ظلم وقهر وصراعات  وخراب ورشوه

وطبعا مفيش حد يقدر ينسى الكوسه عشان طعمها حلو بس بتظلم ناس كتير دايما

اكدب على نفسك وعيش فى وهم ان مفيش حاجه من دى بتحصل خالص

 لانك لو حطيت الكلام ده فى فكرك عمرك ما هتتقدم خالص

الناس بعيده عنك بالرغم من حبك ليهم وانت زعلان من قربك وبعدهم ليك

أكدب على نفسك وعيش نفسك وهم تانى

 انهم قريبين منك عشان انت متبعدش عنهم وخلى معاملتك زى ما هيا ليهم

شايف كأبه ويأس وحزن دايما باين عليهم

وأنت بقيت بتدراى الفرحه قدامهم لحزنك عليهم

لا انت غلطان اكدب على نفسك وأضحك وأبتسم وخلى نظرتك ليهم بالتفائل والرضا
يغنيهم وطلعهم وطلع نفسك من الحزن اللى مليكم

ولو كان نفسك تبكى وتدمع حاول انك تبتسم يمكن تقدر تشيل الدمعه وتكون قريب ليهم.

مستنى رايكم فى الكدبه ودردشتكم

علامات تعرفك مصر

من بين كل العالم واحنا المصريين معروفين بصفات كتيره متتحكيش
ولو فضلت ورا المزايا اللى مخليا مصر مشهوره هتوه من اول الطريق
انا هعرفكم مصر وهوريكم المعالم والشياء التى تميز مصر عن باقى الدول
مصر دى انا مش مصدق انها امى انا حاسس انها مرات ابويا
بتعاملنى انا واغلب الناس الللى زى بقسوه وعدوانيه
معالم وحضاره تميز مصر
اول حاجه واللى متتنسيش طبور العيش الطويل اللى تقف فيه ساعه اتنين تلاته على حسب التساهيل
وممكن تمشى بدرى فى حالات :
1_لو كنت تعرف الراجل اكيد.
2-لو عملت خناقه بسبب اللى جه بعدك وخد العيش قبليك.
3- او لو حطيت ايدك فى جيبك ملقتش المحفظه او الموبايل.
4-او لو اغمى عليك بسبب الزنقه والحر وطول المده.
                                         "المحطه"
طبعا انت لو مسافر اى محافظه داخل مصر ورحت على المحطه تقطع نذكره قطار
اكيد التذكره هيكون مكتوب عليها معاد رحيل القطر يعنى مكتوب عليها معاد.
بس خلى بالك قبل ما تروح الميعاد تعمل حسابك فى برشام صداع وضغط معالك
لانك هتقعد مستنى القطر اللى بيتاخر وقت قليل يعنى مش اقل من ساعه ونص
عن معاده الاصلى يعنى ربنا معاك فى اصوات الناس والقطرات اللى كل شويه تعدى
وغير كل شويه واحد يسالك هو قطر الساعه... لسا موصلش ترد تقوله لا
يقعد جمبك وهاتك يا رغى وسب ولعن فى القطرات واللى صنعها وغيره طبعا
                                  "الكهرباء"
كلنا عارفين ان مفيش حد يقدر يعيش والنور مقطوع
دلوقتى الدوله بتاخد فلوس زياده لخددمات النور فى البلد وبصراحه لقينا احسن خدمه على وجه الاطلاق
وهى انقطاع النور فى وقت الظهر اثناء التهاب الشمس المحرقه فى مناطق كتيره متتعدش
هى دى ياترى الخدمه اللى دفعين فيها فلوس عشان تتحسن ولا عشان تتبهدل واكيد احنا معاها.
                             "الاتوبيس"
الاتوبيس تلاقى عليه مثلا 24 راكب
تدخل تركب تلاقى فيه 50 راكب متعرفش بيتعبوا ازاى
النشل يشتغل والكلام يكتر والمرض ينتقل
واه بقى لو كانت فى وحده حلوه واقفه تلاقى ناس حلوين كدا يعملوا نفسهم بودى جاردات حوليها
متعرفش ليه يعنى المحبه الزياده فى الاتوبيس دى
وكل واحد طلع سجاره وملهوش صالح بالاطفال ولا النساء ولا اى حاجه.
 ايه رايكم فى مصر بالذمه مش تستحق تكون مشهوره
كفايه اللى قلته  مع انى مقلتش حاجه خالص بس هسيبكم تدردشوا وتقولوا وتذودوا
ايه ياترى بيميز مصر فى الجانب السلبى

رساله

مستنى منكم رساله تقولى معنى الكلام.
مستنى منكم رساله تعرفنى على الجواب.
وازاى تجاوبونى وانتوا اصلا ناسينى.
والكل باع العشره واتندم على الكلام.
اااااه وبحرقه على الليالى لما تقسى علينا.
وتفرق الاحباب
والقلوب تلاقيها ناسيه اى قلب فيها داب.
أرجعوا لزمنكم اللى فيه الضمير عاش.
أرجعوا وأعرفوا انى قلبى ميقدرش على بعدكم.
وطول الليل من من هجركم.
وأعرفوا انى بيكم هكون فنان.
قادر يألف قصايد يتحكى بيها الزمان.
أرجعوا واعرفوا أنى بيكم
اقدر اغنى وبعلو صوتى وبأجمل الكلام.
هقولكم ياحبايب قلبى الصغير
اللى اصبح بحبكم كبير
فين رسايل الحب رايحه
اللى محروم منها من سنين.

ادينا بندردش

احنا ليه دايما بنكتم الكلام جوا قلبنا
ليه بنخاف نعبر عن اللى جوانا
ليه بنخاف نغير الواقع اللى حولينا
ليه دايما محبوسين وخايفين
قفلنا على قلوبنا بالقفل خلاص
ياترى خلص الكلام الصح وبقينا بنلخبط فى الكلام
ادينا بندردش وهنحاول اننا نسمع بعضينا
انتم وانا مش مشهورين ولا معروفين
بس عندنا القدره اننا نتغير ونغير
وكل ده وغيره عمره ما يحصل واحنا سكتين
يبقا لازم نتكلم ونعبر ولو بالقليل
شعر نثر خواطر او اى كلام قليل
المهم انك تدردش وتخرج من الصمت المميت