ايوه يا بيه عايز ربنا يكرمك وتبقى وزير روح لسيدك قناوى وأدبحله معزة وهو هيكرمك.
ايوه يا ست ولا يا حجة نفسك تجيبى ولد روحى لستك عبلة مواهب وابكيلها شوية وأعمليلها حلة فتة وهى هتحققلك إللى فى بالك.
يلى نفسك تتجوز وممعكش حاجة يلا روح استلف أو حتى اسرق وأرضى سيدك بهلول فى المولد بتاعه.
وأنتى يلى نفسك فى شكل جميل وجسم مفيش بعد كدا وعريس غنى ونزيه اتصلى بيا وأنا هدلك على أقرب ولى عندك وروحيله وبعدين أدعيلى.
وأنت يلى ملكش بيت أو حتى نفسك تعيش عاله على الناس يلا لف الكون واضحك على الناس وعيشهم انك عايش فى ملكوت تانى مع أسيادك الأموات وأعملهم أنك زاهد.
10 مليون
الرقم ده عايزكم تتخيلوه معايا ده ممكن يعمل أيه؟
الرقم ده كان حصيلة إحدى المساجد فى مصر فى إحدى السنين من صندوق النذور للشيخه الميتة.
يعنى لو عديت كام واحد ووحده ميتة وميت وكام مولد بيتعمل فى السنة وكام واحد بيروح يدفع فلوس.
وكل ده هتفكر صح أن الدنيا زى ما بيقولوا مفيهاش فلوس عشان الفلوس رايحه لأسيادنا أشتاتاً أشتوت.
انتشرت فكرة الموالد دى بطريقة رهيبة وكل بلد وليها طريقة مختلفة ومنها اللى بيحب المراجيح ويسد الشارع وطبعاً غير السهرات وناس مسمينها مشايخ تيجى وتمدح وتقول كلام فى الغالب مش مفهوم وطبعاً لازم أكل وشرب ما هى دى ناس زاهدة فى الدنيا سايبين بيوتهم عشان يلبوا ندا سيدهم الميت فى المولد بتاعه طبعاً.
فلوس كتيره بيدفعها ناس معندهمش عقل وبيروحوا يستلفوا لغاية لما ممكن يروحوا يشحتوا عشان يرمى فلوس للولى عشان يديهم اللى هما عايزينه وده يروح يمسح الأرض والحيطان ويبكى عشان يرضوا سيدهم.
وتيجى تبص لصندوق الشكاوى اللى كاتباه الناس لسيدهم وستهم على أساس هيطلع من التربة وهيحكم الكون ويقرا ويلبى.
مش هكتر فى الكلام لأن الموضوع أكبر من أنه يكون على ورق- يا سيدى ويا ستى فوقوا.
وقوموا من اللى أنتوا فيه. يا ناس عايشة ومش متهنية.
طالما أن عقولكم مش مستنية- أنكم تفكروا زاى الناس تفكروا وتقولوا أنكم أحياء مش أموات.
قوموا وادعوا لرب العباد ومش لا أموات هتكونوا زيهم.
ليست هناك تعليقات:
إرسال تعليق